1 patay, 1 sugatan sa suwagan ng dalawang motorsiklo

PANGASINAN – Patay ang driver ng kulay pulang Suzuki Raider 150 motorcycle matapos itong bumangga sa nakasalubong na Suzuki Smash motorcycle sa Brgy. Panganiban, Tayug ng lalawigang ito kahapon, Mayo 22.

Kinilala ng Tayug Municipal Police Station ang driver ng Suzuki Raider na si Kyle Tejada Dacanay, 21, walang asawa, college student, residente ng Brgy. Saleng ng naturang bayan.

Nakilala naman ang driver ng kulay itim na Suzuki Smash na si Warlito Garcia Miniano, 43, may asawa, residente ng Brgy. Lagasit, San Quintin, Pangasinan.

Bumibiyahe papuntang timog na direksiyon sa provincial highway sa naturang lugar ang Suzuki Smash samantalang papunta naman ng opposite direction ang Suzuki Raider.

Pagdating sa lugar kung saan nangyari ang aksidente, umagaw umano ng linya ang Suzuki Raider at nabangga nito ang nakasalubong na Suzuki Smash.

Kapwa sugatan ang dalawang driver na mabilis na isinugod sa Eastern Pangasinan District Hospital sa naturang bayan.

Gayunman, ang driver ng Suzuki Raider ay idineklarang dead-on-arrival ng umatending doktor. Rolando S. Gamoso