MANILA, Philippine – Natukoy na ng House of Representatives ang 10 ahensya na aalisan ng confidential at intelligence funds (CIF) sa proposed budget para sa 2024.
Binigyang-diin ni Marikina 2nd District Rep. Stella Quimbo na ang realignment ng mga pondo ay magbibigay prayoridad sa mga ahensya sa unahan sa pagtugon sa mga tensyon sa West Philippine Sea.
“Patuloy po natin pinag-aaralan, china-chop-chop pa po ang ibang pondo sa ibang ahensya. Patuloy ang pag-rationalize natin ng confidential at intelligence fund,” ani Quimbo sa mga mamamahayag.
Gayunpaman, tumanggi si Quimbo na magbigay ng detalye sa 10 ahensya na natukoy na.
Nauna rito, nangako ang Kamara na tanggalin at i-realign ang Office of the Vice President at ang CIF ng Department of Education sa gitna ng panggigipit ng publiko.
Si Bise Presidente Sara Duterte ay humiling ng ₱500 milyon para sa kumpidensyal na pondo ng OVP at ₱150 milyon para sa DepEd, na kasabay niyang pinamumunuan.
“Posible din po idagdag sa ibang mga programa na nagkulang din sa pondo sa NEP (National Expenditure Program) 2024,” ani Quimbo.
Ang isang maliit na komite, na nabuo sa mababang kamara, ay magpupulong sa Lunes upang tapusin ang mga mungkahi. RNT
