2 ginang arestado sa Malabon buy bust

Bagsak sa kulungan ang dalawang ginang na sangkot umano sa illegal na droga matapos maaresto sa isinagawang buy bust operation ng pulisya sa Malabon City, kahapon ng madaling araw.

Kinilala ni Malabon police chief P/Col. Amante Daro ang naarestong mga suspek na sina Cherrie Bautista alyas “Che”, 54, ng Obando, Bulacan at Diwata Pelaez alyas “Diway”, 38, candy vendor ng Brgy. Panghulo.

Ayon kay Col. Daro, dakong ala-1:50 ng madaling araw nang madakip ang mga suspek ng mga operatiba ng Station Drug Enforcement Unit (SDEU) sa ilalim ng pangangasiwa ni P/Cpt Alexander Dela Cruz sa Panghulo Road, Brgy., Panghulo.

Nakumpiska sa mga suspek ang dalawang heat sealed transparent plastic sachets na naglalaman ng humigi’t kumulang P37,400.00 halaga ng hinihinalang shabu at isang P500 billa na ginamit bilang buy bust money.

Ani Cpt Dela Cruz, unang nakatanggap ng impormasyon ang kanyang mga tauhan na nagbebenta umano ng shabu si Bautista kaya ikinasa nila ang buy bust operation na nagresulta sa pagkakaaresto sa mga suspek matapos bintahan ng P500 halaga ng shabu ang isang pulis na nagpanggap na buyer.

Mahaharap ang suspek sa kasong paglabag Comprehensive Dangerous Drug Act of 2002. Boysan Buenaventura