MANILA, Philippines- Sumuko na sa mga awtoridad ang dalawang suspek sa pagpatay sa traffic enforcer na si William Quiambao sa Tanza, Cavite, ayon sa Cavite Police Provincial Office nitong Martes.
Inihayag ng Cavite Police na ang mga suspek na kinilalang sina Joseph Llagas at Aries Carlos, ay sumuko kay Cavite Governor Jonvic Remulla sa pamamagitan ng isang barangay chairwoman kaninanga alas-10 ng umaga.
Dinala ang dalawang suspek sa Tanza Municipal Police Station.
Batay sa ulat, sinabi ng mga pulis na bago ang insidente, nagmamaneho si Llagas ng motorsiklo habang nakainom ito.
Sinita ni Quiambao ang suspek na nauwi sa mainit na komprontasyon.
Base sa mga pulis, tatlong beses umanong binaril ni Llagas si Quiambao sa likod ng kanyang ulo.
Nahagip sa video ang insidente na kumalat sa social media.
Idineklara si Quiambao na dead on arrival ng umatending doktor sa Tanza Specialist Medical Center.
“We will continue to monitor the situation and provide updates as they become available,” ani Cavite police chief Police Colonel Christopher Olazo.
“The person who surrenders to authorities sends a strong message that lawbreakers will not be tolerated and that those responsible for such behavior will be held accountable for their actions,” dagdag niya. RNT/SA
