2 tulak tiklo sa P44K shabu sa Malabon

MANILA, Philippines – Swak sa kulungan ang dalawang bagong identified drug personalities matapos makuhanan ng nasa P44,000 halaga ng shabu sa buy bust operation sa Malabon City, kahapon ng madaling araw, Mayo 18.

Kinilala ni Malabon police chief P/Col. Amante Daro ang naarestong mga suspek na sina Juver Rivera, 47, construction worker at Jellan Nuñez, 21, kapwa ng Celia II Brgy. Bayan-Bayanan.

Ayon kay Col. Daro, nakatanggap ang mga operatiba ng Station Drug Enforcement Unit (SDEU) sa ilalim ng pangangasiwa ni P/Cpt Alexander Dela Cruz ng impormasyon hinggil sa umano’y illegal drug activities ng mga suspek kaya ikinasa nila ang buy bust operation laban sa mga ito sa Cella II, Brgy. Bayan-Bayanan dakong ala-1:30 ng madaling araw.

Matapos tanggapin ng mga suspek ang P500 marked money mula sa isang pulis na nagpanggap na buyer kapalit ng isang plastic sachet ng shabu ay agad silang sinunggaban ng mga operatiba.

Nakumpiska sa mga suspek ang tatlong heat-sealed transparent plastic sachets na naglalaman ng humigi’t kumulang P44,200.00 halaga ng hinihinalang shabu at buy bust money.

Mahaharap ang mga suspek sa kasong paglabag sa Comprehensive Dangerous Drug Act of 2002. Boysan Buenaventura