3 pulis ipinasisibak kaugnay sa pamamaril, paggranada sa NPD-DDEU office

MANILA, Philippines – Tatlong pulis ang ipinasisibak sa tungkulin ng pamunuan ng National Capital Region Police Office (NCPO) hinggil sa pamamaril at paggranada sa tanggapan ng Northern Police District (NPD)-Drug Enforcement Unit (DDEU) at Criminal Investigation and Detection Group (CIDG) North – Metro Manila District Field Unit noong Mayo 20.

Inatasan si PBGEN Ponce Rogelio Penones, District Director ng NPD na alisin sa pwesto sina PLTCOL MICHAEL CHAVEZ, NPD DDEU; PMAJ DENNIS ODTUHAN, Assistant Chief, NPD DDEU; at PCAPT IVAN RINQUEJO, Commander, Sub Station 4 upang bigyang daan umano ang masusing imbestigasyon hinggil sa naturang pangyayari.

Maliban dito, binigyan ng isang linggong palugit ang Caloocan City Police Station upang matukoy kung sino ang mga walang habas na nagpaputok ng baril at naghagis ng granada sa nasabing opisina.

Magugunitang nitong Sabado ng madaling araw, Mayo 20 ay ginulantang ng sunod-sunod na putok ng baril na sinundan ng paghahagis ng granada ang harapan ng tanggapan ng DDEU dakong ala-1:45 ng madaling-araw.

Magugunitang tumagos ang mga bala sa loob ng tanggapan ng DDEU na dahilan ng pagkasira ng hagdanan at pagkakaroon din ng tama ng bala at metallic fragment ng granada ang dalawang nakaparadang sasakyan sa harapan ng naturang tanggapan.

Mariin umanong kinokondena ng NCRPO ang ganitong klase ng pag-atake at maling gawain dahil nalagay sa panganib ang buhay hindi lamang ng kapulisan kundi maging ang buhay ng naroon sa nasabing lugar nang maganap ang insidente.

“Bagama’t walang nasugatan sa nasabing insidente, importanteng malaman natin kung sino ang may kagagawan nito at kung ano ang kanilang motibo. Hindi natin pahihintulutan ang mga indibidwal na ito na magdulot ng sakuna laban sa kaligtasan at seguridad lalo na sa ating mga nasasakupan,” ayon sa pahayag ng NCRPO.

Kaugnay nito, may mga suspek na ang Caloocan Police sa pamamaril.

Ayon kay Caloocan police chief P/Col. Ruben Lacuesta, nakuhanan na nila ng sinumpaang pahayag ang mga testigo habang patuloy pa rin nilang tinitipon ang iba pang mga ebidensiya upang maging malakas ang kasong isasampa nila laban sa mga suspek.

Hindi na muna pinangalanan ng pulisya ang mga suspek dahil patuloy pa rin nilang ginagawa ang backtracking at pagsusuri sa kuha ng mga nakakabit na close circuit television (CCTV) camera sa lugar at maging sa mga lansangang dinaanan ng mga ito para matiyak na wala silang lusot sa batas.

Naniniwala ang hepe ng Caloocan police na may koneksyon sa mga malalaking huli ng naturang tanggapan ang ginawang pamamaril at paghahagis ng granada ng mga suspek na aniya ay ganti na rin ng mga ito sa kanilang agresibong operasyon laban sa sindikato ng ilegal na droga na nagresulta upang maapektuhan ng husto ang kanilang masamang gawain. Merly Iral