Aurora, Philippines – Sinugod sa ospital ang 50 residente sa Casiguran, dahil sa pagtagas ng ammonia sa isang planta ng yelo.
Nakaranas ng pananakit ng ulo, pananakit ng lalamunan, at panlalabo ng paningin ang mga residente matapos malantad sa kemikal base sa mga ulat.
Inilikas naman sa evacuation center ang nasa 44 na pamilya.
Sinabi ng pamunuan ng planta ng yelo na tinutugunan na nila ang problema na humantong sa pagtagas ng ammonia.
“Ang ammonia ay ginagamit bilang isang nagpapalamig na gas, para sa paglilinis ng mga suplay ng tubig, at sa paggawa ng mga plastik, pampasabog, tela, pestisidyo, tina, at iba pang mga kemikal. Karamihan sa mga tao ay nalantad sa ammonia mula sa paglanghap ng gas o mga singaw,” anang Department of Health.
Ang pangunang lunas ay agad na banlawan at i-decontaminate ang balat at mata gamit ang saganang dami ng malinis na tubig, habang ang paggamot ay binubuo ng mga pansuportang hakbang at maaaring kabilangan ang pagbibigay ng oxygen, bronchodilators, at airway management, dagdag ng DOH. RNT
