MANILA, Philippines – Inirekomenda ng Philippine National Police – Internal Affairs Service (PNP-IAS) nitong Biyernes ang suspensiyon ng hanggang 59 na araw ng mahigit 20 pulis kaugnay ng pagkamatay ng binatilyong si Jemboy Baltazar.
Sinabi ni PNP-IAS inspector general Atty. Alfegar Triambulo na kabilang dito ang ilang tauhan na nabigong mapanatili ang pinangyarihan ng krimen at magsagawa ng ballistic at paraffin test sa mga pulis na sangkot sa aktwal na operasyon.
Dagdag pa ni Triambulo, ang mga rekomendasyon ay para sa ikalawang batch ng mga kasong administratibo laban sa mga pulis.
Kasama rin sa suspensiyon ang walong pulis na napatunayang nagkasala ng Grave Irregularity in the Performance of Duty and Conduct Unbecoming of a Police Officer.
Nauna na silang inirekomenda ng PNP-IAS na tanggalin sa serbisyo, na kalaunan ay inaprubahan ng National Capital Region Police Office (NCRPO).
Dalawang pulis na nagsilbing imbestigador sa kaso, samantala, ay inirerekomenda para sa 30-araw na suspensiyon dahil sa mga lapses sa kanilang imbestigasyon.
Si Baltazar, 17, ay namatay noong Agosto 2 habang patungo sa pangingisda matapos siyang pagbabarilin at mapatay ng mga pulis ng Navotas City na tumutugis sa suspek sa pamamaril sa Barangay NBBS Kaunlaran.
Ang kilalang forensic pathologist na si Dr. Raquel Fortun ay nagsabi na ang resulta ng autopsy ay nagsiwalat na si Baltazar ay mayroon ding tama ng baril sa kanyang kanang kamay, na nagpapahiwatig na sinubukan niyang ipagtanggol ang kanyang sarili.
Napag-alaman sa autopsy na dalawang beses tinamaan si Baltazar, sa ulo na may entry wound sa likod ng tenga at exit wound sa ilong, habang ang isa pang putok ay tumama sa kanang kamay. RNT
