60 ex-rebels sa Negros, pasok sa TUPAD

MANILA, Philippines – Nasa 60 dating rebelde ang binigyan ng tulong pinansyal ng Department of Labor and Employment (DOLE) sa Western Visayas sa pagpapasailalim sa kanila sa programang TUPAD (Tulong Pangkabuhayan sa Ating Disadvantaged/Displaced Workers).

Nagmula ang mga benepisaryo sa mga barangay ng Buenavista, Carabalan, San Antonio at Mahalang sa Himamaylan City sa Negros Occidental.

Ayon sa DOLE, humingi ng tulong-pinansyal ang mga sumukong rebelde sa lokal na pamahalaan para makatulong sa pag-uumpisa nila ng panibagong buhay na siyang humiling sa DOLE-Western Visayas na isailalim ang mga benepisaryo sa TUPAD.

Ang tulong na trabaho ay hindi lamang upang bigyan ang mga dating rebelde ng pinansyal kundi upang mas patatagin ang kanilang pagtitiwala sa pamahalaan.

Nakatanggap ang bawat isa sa mga benepisaryo ng tig-P4,500 na suweldo sa 10 araw na ‘community service’ sa kanilang mga lokalidad. Jocelyn Tabangcura-Domenden