MANILA, Philippines – HINARANG ng mga opisyal ng Bureau of Immigration (BI) sa Ninoy Aquino International Airport (NAIA) Terminal 1 ang isang Chinese, na inakalang Pinoy, makaraang pauwiin ito sa Pilipinas matapos mabiktima ng trafficking sa Myanmar.
Nataranta ang mga opisyal ng imigrasyon matapos ipakita ni alyas ‘King’ ang kanyang sarili bilang isang Filipino sa arrival inspection, sa kabila ng pagiging isang dayuhan.
Nabatid na ang mga pangalan ay inalis bilang pagsunod sa mga kasalukuyang batas laban sa trafficking.
Ayon sa BI, si alyas ‘King’, 40, ay umalis ng bansa noong Hulyo 2023 patungong Thailand gamit ang Chinese passport, na may hawak na permanent residence visa sa ilalim ng RA 7919. Inamin niya na ginamit niya ang kanyang Chinese passport gaya ng payo ng kanyang mga recruiter para maiwasan ang pagtatanong tungkol sa kanyang layunin sa paglalakbay
Pagdating umano nito sa Thailand, tumawid ito sa ilog patungong Myanmar kasama ang 3 iba pa. Ikinuwento niya kung paano siya binayaran lamang ng isang buwan, ngunit pinarusahan siya nang maglaon.
Pinalaya siya matapos bayaran ang kanyang mga recruiter ng 20,000 baht o higit sa P32,000, ngunit inaresto ng Thai immigration at pinigil ng 3 buwan.
Sinabi ni ‘King’ na natakot siya na ma-deport siya sa China kung gagamitin niya ang kanyang Chinese passport, at idineklara niyang hindi pa siya nakabalik sa China mula nang dalhin siya ng kanyang ina sa Pilipinas noong siya ay anim na buwang gulang. Ang kanyang ina ay isang permanent residence holder sa Pilipinas, habang ang kanyang ama ay isa umanong naturalized Filipino.
Nabatid na binigyan umano ito ng Philippine travel document ng Philippine embassy sa Bangkok at ipinatapon sa Pilipinas.
Sinabi naman ni BI Commissioner Norman Tansingco na ang mga insidenteng tulad nito ay epekto ng mga migranteng Tsino na kumukuha ng mga shortcut upang makakuha ng pagkamamamayan ng Pilipinas.
“You cannot buy citizenship. You can be born with it, or be naturalized. There are no other modes or shortcuts in acquiring Philippine citizenship,” ani Tansingco.
Sinabi ni Tansingco na siya ay natutuwa na ang mga isyu sa citizenship for sale ay inilalahad, na nagsasaad na itinaas na nila ang alalahanin na ito sa nakalipas na ilang taon, sa pangamba na ito ay usapin ng pambansang seguridad.
“We are glad that many government agencies and lawmakers are already looking into this issue,” ani Tansingco. “This is a national security concern that needs to be addressed, lest it be abused by foreign nationals with malicious intent in the Philippines,” dagdag pa ng opisyal.
Inaresto si alyas ‘King’ at mananatili sa holding facility ng BI sa Bicutan, Taguig habang nahaharap sa kasong immigration deportation. Jay Reyes
