MAYNILA – Muling inisnab at hindi sinipot ni suspendidong Bamban Mayor na si Alice Guo nitong Lunes ang preliminary hearing ng Department of Justice (DOJ) sa mga kasong human trafficking na isinampa laban sa kanya at sa iba pang co-respondents.
Nabigo rin si Guo at iba pang mga co-respondent na humarap noong Hulyo 4 sa unang preliminary investigation na isinasagawa ng DOJ panel of prosecutors, ayon kay Undersecretary Nicholas Felix Ty.
Sinabi ni Ty na si Guo at ang kanyang kapwa akusado kabilang si Dennis Cunanan, gayunpaman, ay kinatawan ng mga abogado.
Inihain ng Presidential Anti-Organized Crime Commission (PAOCC) at Criminal Investigation and Detection Group (CIDG) ang reklamo laban kay Guo dahil sa umano’y papel nila sa mga iligal na operasyon ng sinalakay na Philippine Offshore Gaming Operator (POGO) hub sa Bamban, Tarlac.
Si Guo at ang mga kasamang tumugon, gayunpaman, ay binigyan ng palugit hanggang Agosto 6 para isumite ang kanilang mga counter-affidavit matapos maghain ng supplemental complaint ang PAOCC at CIDG para isama ang isang Pilipinong respondent.
“Non-extendible. Sabi din sa akin ng mga complainant, ng team ng law enforcement na after this, malamang hindi na sila mag-re-reply (sa) affidavit,” sabi ni Ty.
Sinabi ng tagapagsalita ng PAOCC na si Winston Casio na ang karagdagang respondent ay kasangkot sa pamamahala ng Zun Yuan Technology, Hongsheng at Baofu Land Development. RNT
