MANILA, Philippines – Mahigit 1,000 surface maritime patrols na ang isinagawa ng Armed Forces of the Philippines (AFP) mula nang magsimula ang administrasyong Marcos.
Sa Report to the People ni Pangulong Ferdinand Marcos Jr., nagsagawa ang AFP ng 1,482 surface maritime patrols at 485 aerial maritime patrols, na layong palakasin ang maritime domain awareness sa teritoryo ng Pilipinas.
Ang mga pagpapatrolyang ito ay isinagawa mula Hulyo 2022 hanggang Mayo 2024.
Bukod sa mga operasyong ito, nagsagawa rin ang Philippine Coast Guard ng 63 maritime patrols at 52 security escorts para sa rotation and resupply (RORE) missions.
Nagkaroon din ng 18 maritime domain awareness flights ang PCG sa Kalayaan Island Group para imonitor ang presensya ng mga foreign vessel at magbigay ng suporta sa mga lokal na mangingisda sa lugar.
Dahil sa naturang mga operasyon, tumaas ang bilang ng mga bangkang pangisda ng mga Filipino sa katubigang sakop ng Kalayaan mula 159 bangka noong 2022 ay nagging 350 na noong 2023.
”As a rule-abiding member in the community of nations, the Philippines will continue to be guided by the rule of law as we uphold our sovereignty and territorial integrity and exercise our sovereign rights in the maritime areas under our jurisdiction,” sinabi pa ni Marcos sa kanyang ulat. RNT/JGC
