NEW YORK – Kabilang ang dalawang Pilipina na miyembro ng US Army sa tatlong indibidwal na nasawi matapos bumagsak ang kanilang sasakyan sa 400 talampakang bangin sa Devil’s Slide sa Highway 1 sa California noong Hulyo 26.
Kinilala ang mga biktima na sina Brylyn Aroma, 36, Angelica Gacho, 28, at Mohammad Noory, 29, mula sa Afghanistan.
Si Aroma, tubong Cavite, ay isang nars at isang highly decorated na US Army combat medic specialist. Nag-aral siya sa Emilio Aguinaldo College sa Maynila at De La Salle University.
Kabilang sa mga parangal na natanggap ng Aroma mula sa US Army ay ang National Defense Service Medal, ang Global War on Terrorism Service Medal, at ang Army Service Ribbon.
Si Gacho, isa ring Filipina US Army member at isang communication and water treatment specialist, ay nakatanggap ng iba’t ibang mga parangal, kabilang ang dalawang Army Achievement Medals, ang National Defense Service Medal, ang Korea Defense Service Medal, at ang Army Service Ribbon. Nagtapos siya sa Taguig City University.
Iniulat ng California Highway Patrol na nahulog ang sasakyan sa mapanganib at mabatong bahagi ng Devil’s Slide sa baybayin ng San Mateo County.
Dumausdos ang sasakyan sa mabatong baybayin at bahagyang lumubog sa karagatan.
Nagsasagawa pa ng imbestigasyon ang mga awtoridad upang matukoy ang sanhi ng aksidente. RNT
