MANILA, Philippines – Sinabi ng legal counsel ni Pastor Apollo Quiboloy nitong Linggo na ang Kingdom of Jesus Christ (KOJC) ay nag-aalok ng P20 milyon sa mga makapagbibigay ng impormasyon kung sino ang nag-donate ng P10 milyong pabuya laban kay Quiboloy.
“According to the officers of KOJC, mayroon po silang inaalok na P20 million sa mga makapagbibigay ng impormasyon kung sino ang nagbigay ng pribadong pera kay [DILG] Sec. Benhur Abalos para daw madakip si Pastor Quiboloy,” ani Atty. Israelito Torreon sa TeleRadyo Serbisyo.
“Sa amin pong palagay, ‘yung pagtanggap po ng pera sa mga pribadong tao ay iligal pursuant to Republic Act 6713 Sec. 7D,” aniya pa.
Sa ilalim ng Republic Act 6713 Sec. 7D, “ang mga pampublikong opisyal at empleyado ay hindi dapat manghingi o tumanggap, direkta o hindi direktang, anumang regalo, pabuya, pabor, libangan, pautang o anumang bagay na may halaga sa pera mula sa sinumang tao sa kurso ng kanilang mga opisyal na tungkulin.”
“Ang mga opisyal ng KOJC ay interesado kung sino itong mga pribadong tao na nagtaas ng pera para malaman kung ano ang ikinagalit nila kay Pastor Apollo Quiboloy o ano ba ‘yung mga pakay nila o may ipadala ito kay sec abalos,” dagdag pa ni Torreon.
Aniya pa, naghahanap din ng impormasyon ang mga opisyal ng KOJC sa umano’y assassination team na binuo laban kay Quiboloy.
“Gusto rin nilang malaman kung sino ang makakapagbigay ng impormasyon dun sa nagbabalak daw na patayin si pastor. Kasi may team daw na binuo para i-assassinate si Pastor Apollo Quiboloy,” giit pa ng abogado.
Nang tanungin kung paano nila ibe-verify ang impormasyon tungkol sa plano ng pagpatay, sinabi ni Torreon na ito ay pagdedesisyonan lamang ng mga opisyal ng KOJC.
“That is decided by my client. Sila naman ay private sector naman. That’s it. They are not governed by any rule. Except the fact that if they feel that the information is [true], then they will decide as to the matter, ” sinabi niya.
Nang tanungin kung saan nanggaling ang P20 milyon na alok, sinabi ng abogado na ang KOJC ay may mga miyembro sa buong mundo at “mayroon silang halos 7 milyon” na miyembro, kaya ang pagsasama-sama ng pera para sa pabuya ay matamo.
Noong nakaraang Hulyo 8, inihayag ng DILG na nag-aalok ito ng P10 milyon para sa impormasyon na humahantong sa pag-aresto kay Quiboloy at tig-P1 milyon na humahantong sa pag-aresto sa kanyang kapwa akusado. RNT
