Mga nasalanta ng bagyo inayudahan ni Sen. Lapid

NAMAHAGI si Senador Lito Lapid ng higit dalawang libong relief goods  para sa mga biktima ng bagyong Kristine na puminsala sa malaking bahagi ng Luzon, partikular sa Quezon, Cavite at Batangas provinces nitong Lunes, Oct. 28.

Unang pinuntahan ni Sen. Lapid ang bayan ng Rosario, Cavite na may 500 biktima ng bagyo ang naabutan ng relief goods.

Sumunod naman ang bayan ng Tanza Uno sa Cavite na may 500 benepisyaryo ang tumanggap ng tulong.

Bandang hapon, tumuloy naman si Lapid sa bayan ng Calaca, San Luis at San Pascual sa Batangas para ipagpatuloy ang pamamahagi.

Sa kanyang mensahe, nagpaabot  ang Senador ng pasalamat sa Batangas na tumulong sa mga Kapampangan nang pumutok ang Mount Pinatubo noong  taong 1991.

“Alam ko po ang nararamdaman nyo at pangangailangan ng mga kababayan nating biktima ng mga kalamidad. Kami rin po ay biktima ng pagsabog ng bulkang Pinatubo noong Governor pa ako. Kayo po ang isa sa mga nagpahatid ng tulong sa amin, kaya bilang pagtanaw  ng utang na loob, nagdala po ang aking tanggapan ng kaunting tulong para sa inyo. Kahit papaano ay makatulong nawa ito sa inyong pangangailangan.”

“Maraming-maraming salamat po sa naging pagtulong nyo sa Pampanga. Nagpauna na rin po ako ng ayudang isang million dito sa San Pascual,” ayon kay Lapid

Lubos naman nagpasalamat si Batangas Congresswoman Jinky Bitrics Luistro sa dinalang food packs ni Lapid sa kanyang distrito.

Nagpaabot din ng pasalamat sina Calaca, Batangas, Mayor Nas Ona at VM Jerry “Pipo” Katigbak sa tulong na ibinahagi ng Lingkod Lapid.

Nangako si Lapid na muling babalik sa Batangas kapag nakahanap ng kaunting pondo para maghatid ng ayuda sa Quezon, Cavite at Batangas. RNT