3 tiklo sa ₱32.6-M illegal vape na nasamsam sa Laguna — NBI

MANILA, Philippines – Inaresto ng National Bureau of Investigation (NBI) ang tatlong indibidwal at nasamsam ang mahigit ₱32.6 milyon halaga ng ilegal na vape products sa isang raid sa Biñan City, Laguna noong Hulyo 7.

Kinilala ni NBI Director Jaime Santiago ang mga suspek na sina Kert Simbajon, Javier Dirampatun, at Romeo Cada. Nahuli ang mga ito matapos matuklasang nagbebenta ng hindi rehistradong vape sa isang tindahan sa Bacoor, Cavite na walang BIR tax stamp at DTI permit.

Sa pamamagitan ng cybercrime surveillance, natunton ng mga operatiba ang operasyon ng grupo sa Cavite at Laguna. Narekober sa isang imbakan sa Laguna ang higit 40,000 piraso ng vape at halos 4,000 pods.

Kakasuhan ang mga suspek sa ilalim ng Republic Act 11900 (Vape Regulation Law) at RA 10175 (Cybercrime Prevention Act). RNT