BATANGAS, Philippines – Itinaas ng pamahalaang panlalawigan ng Batangas nitong Sabado ang alert status ng provincial disaster management operation center sa “blue alert status” upang masubaybayan ang mga development at matiyak ang koordinasyon dahil sa epekto ng habagat at Tropical Storm “Crising” (international name: Wipha).
“In line with the advisories from PAGASA on the EFFECTS OF SOUTHWEST MONSOON ENHANCED BY TROPICAL CYCLONE #CrisingPH in the Province of Batangas, the PDRRMC Emergency Operations Center (EOC) is hereby maintained to BLUE ALERT STATUS,” inihayag ng Batangas public information office sa kanilang Facebook page nitong Sabado ng umaga, Hulyo 19.
Ang isang blue alert status ay nangangahulugan na ang lahat ng disaster risk reduction management council personnel at equipment ay naka-standby sa kaso ng emergency.
Isinaaktibo din nito ang mga panlalawigang Disaster Risk Reduction Management Council (PDDRMC) response clusters at incident management team sa “Bravo Protocol (Oplan Listo).”
Ang “Oplan Listo” ay isang disaster preparedness program ng Department of the Interior and Local Government, na dinisenyo upang gabayan ang mga local government units sa paghahanda at pagtugon sa mga sakuna tulad ng bagyo.
Huling namataan ang bagyo sa layong 125 kilometro kanluran-hilagang-kanluran ng Calayan, Cagayan, ayon sa Philippine Atmospheric, Geophysical and Astronomical Services Administration (Pagasa) sa kanilang 5 a.m. bulletin nitong Sabado.
Ayon sa Pagasa, lalakas ang Crising bilang isang matinding tropical storm bago ito lumabas sa Philippine area of responsibility sa Sabado ng umaga o madaling araw. RNT/MND
