MANILA, Philippines – DALAWANG Chinese warships ang namonitor habang nagsasagawa ng joint sail ang Pilipinas kasama ang India sa West Philippine Sea (WPS).
Ang joint patrol ng Manila at New Delhi ay nabuo habang binibisita ni Pangulong Ferdinand Marcos Jr. ang India sa imbitasyon ni Prime Minister Narendra Modi.
Araw ng Linggo, Agosto 3 ay sumali ang Indian warships guided missile destroyer INS (Indian Naval Ship) Delhi, anti-submarine warfare corvette INS Kiltan, at fleet tanker INS Shakti sa guided missile frigate BRP Miguel Malvar sa joint patrol nito sa WPS.
“During the patrol, the country’s guided missile frigate monitored People’s Liberation Army-Navy (PLA-N) warships Jiangkai II Class frigate with bow number 551 and Luyang Class destroyer with bow number 161,” ayon kay Lt. Col. John Paul Salgado assistant chief ng public affairs office ng Armed Forces of the Philippines (AFP).
Sinabi ni Salgado na ang Jiangkai frigate ay namonitor sa layong 10 nautical miles (NM), habang ang Luyang destroyer ay namonitor naman sa 15 NM ang layo mula sa BRP Miguel Malvar.
Gayunman, sinabi ni Salgado na ang maritime cooperative activity “proceeded without interference from the PLA-N vessels.”
“However, they are being continuously monitored and tracked,” ang sinabi pa rin ni Salgado sa isang kalatas.
Ang Pilipinas ay mayroong sovereign rights sa WPS at may karapatan na magsagawa ng economic activities sa western section ng exclusive economic zone nito, subalit ang ibang bansa ay nananatiling may karapatan sa freedom of navigation at overflight doon.
Ang presensiya ng PLA-N ay nakahanay sa paggigiit ng Beijing ng soberanya nito sa halos buong South China Sea, subalit ipinawalang bisa ng July 2016 arbitral award ang bagay na ito habang ang kautusan ay pabor sa sovereign rights ng Pilipinas.
Samantala, matatandaang ang Maynila at Delhi ay nagsagawa ng drills sa WPS noong 2021. Kris Jose
