MANILA, Philippines – Ang aftershocks mula sa magnitude 6.9 na lindol na tumama sa Cebu noong Setyembre 30 ay patuloy na naitala, ngunit ang mga ito ay mas madalang na nangyayari ngayon, sabi ng Philippine Institute of Volcanology and Seismology (Phivolcs).
Hanggang alas-10 ng umaga nitong Lunes, Oktubre 6, sinabi ng Phivolcs na nakapagtala na ito ng 7,092 aftershocks, kung saan 1,385 ang na-plot at 31 ang naramdaman.
Ang pinakamalakas na aftershock sa ngayon ay nagrehistro ng magnitude na 5.1.
Ipinaliwanag ni Phivolcs senior science research specialist Charmaine Villamil na normal at natural ang makaranas ng aftershocks, lalo na kasunod ng malakas na lindol.
“These may persist for weeks to months, as the portion of the Earth’s crust that moved during the main quake continues to adjust to a stable condition,” aniya.
Gayunpaman, base sa kasalukuyang monitoring, ipinunto ni Villamil na bumababa na ang bilang ng aftershocks kada araw, na nagpapahiwatig na unti-unti nang humihina ang seismic activity sa lugar. RNT/MND
