MANILA, Philippines – Nag-adjourn ang Senado nitong Biyernes, Oktubre 10, para sa Undas break nang walang naganap na pagbabago sa liderato.
Maikling nagbukas ang sesyon bandang 10 a.m. at agad ding isinara matapos dumalo lamang sina Senate President Vicente “Tito” Sotto III, Deputy Majority Leader JV Ejercito, at Sen. Robinhood Padilla.
Sa maikling sesyon, binasa ni Ejercito ang liham mula sa House of Representatives na nagsasabing hindi pa ito mag-a-adjourn upang maaprubahan ang 2026 budget sa ikalawa at ikatlong pagbasa. Nakatakda namang mag-adjourn ang Kamara sa Lunes, Oktubre 13.
Nauna rito, pinabulaanan ni Senate Minority Leader Alan Peter Cayetano ang mga kumakalat na tsismis ukol sa posibleng pagbabago ng liderato bago ang session break. Itinanggi rin ni Cayetano, na napapabalitang target ang Senate presidency, na may plano siyang patalsikin si Sotto. RNT
