P2.1M pekeng sigarilyo nasabat sa checkpoint

DIADI, Nueva Vizcaya – Nasabat ng mga kapulisan ng Nueva Vizcaya ang 53 kahon ng Bon International cigarettes o pekeng sigarilyo na may tinatayang halaga na P2,120,000.00 at naaresto ang isang driver ng van sa kahabaan ng National Highway, Barangay Nagsabaran, Diadi, Nueva Vizcaya nitong Oktubre 25, 2025.

Magkasanib-puwersa ang mga tauhan ng 2nd MP, 1st NVPMFC, katuwang ang Diadi Police Station at Provincial Intelligence Unit, sa operasyon na nagresulta sa pagkakahuli kay alyas HAJI, 38 anyos, residente ng Capaz, Tarlac.

Batay sa report, bandang 11:20 ng umaga, habang isinasagawa ang routine anti-criminality checkpoint sa nasabing lugar, isang Mitsubishi L300 FB Body Close Van na may plate number NKQ4665 ang pinahinto para magsagawa ng inspeksyon.

Nakita sa loob ng sasakyan ang bahagyang nakabukas na kahon na naglalaman ng mga sigarilyo.

Inamin ng driver na ang mga sigarilyo ang kanyang dala subalit nabigong ipakita ang mga kaukulang dokumento, dahilan ng kanyang agarang pagkaaresto.

Nahaharap ang suspek sa kasong paglabag sa Section 263 ng RA 8424 (Unlawful Possession or Removal of Articles Subject to Excise Tax without Payment of Tax) at RA 10643 (Graphic Health Warnings on Tobacco Products).

Rey Velasco