MANILA, Philippines – Isinumite ni Rep. Leila de Lima sa House of Representatives ang isang panukalang batas na naglalayong ipagbawal ang conversion ng mga irrigated at irrigable agricultural lands upang masiguro ang seguridad sa pagkain.
Ang House Bill No. 5762 o Agricultural Land Conversion Ban Act ay naglalayong amyendahan ang Section 20 ng Local Government Code (RA 7160) at magpataw ng mas mahigpit na kondisyon bago payagan ang land reclassification.
“The haphazard conversion of agricultural lands for non-agricultural uses poses serious threats to the country’s food security, environmental sustainability, and rural development,” ani de Lima.
“Kailangan wakasan ang walang pakundangang conversion ng ating mga lupang agrikultural. Imbes na gawin itong mga subdivision, resort, o mga establisyamento, dapat bigyan ng sapat na suporta ang ating mga magsasaka at mangingisda para tumaas ang kanilang produksyon at kita.”
Ayon sa Department of Agrarian Reform, 98,939 ektarya ang naaprubahan para sa conversion mula 1988 hanggang 2016, habang tinatayang 165,000 ektarya ng irrigated prime agricultural land ang naiko-convert bawat taon, at may ilan ding ilegal na kaso.
“The right to adequate food is a foremost human right that our government must prioritize. This should translate into a robust protection of our agricultural lands and food-producing areas, while championing the rights and welfare of our farmers and fisherfolk,” dagdag pa ni de Lima. RNT
