MANILA, Philippines – Ipinahayag ni Senate President Pro Tempore Panfilo Lacson nitong Martes na tatawag ang Senate Blue Ribbon Committee kay dating House Speaker Martin Romualdez, resigned Ako Bicol Rep. Zaldy Co, at 17 pang kongresista upang ipagpatuloy ang imbestigasyon sa umano’y irregularidad sa flood control projects.
Nakaiskedyul na magsimula ang pagdinig sa Nob. 14, at ipapadala ang mga paanyaya sa pamamagitan ng House leadership.
Maaaring dumalo si Co via Zoom, ngunit ang kanyang testimonya sa ibang bansa ay magiging valid lamang kung ito ay isasagawa sa Philippine embassy, na puwedeng i-affirm sa isang consul pagkatapos.
Paglilinaw ni Lacson na hindi pa niya direktang nakontak si Co at lahat ng paanyaya ay susundin ang pormal na proseso.
Ang pagdinig ay kasunod ng testimonya noong Setyembre nina kontraktor Cezarah Rowena at Curlee Discaya, na nagtukoy sa ilang kongresista, staff, at mga opisyal ng DPWH na diumano’y sangkot sa anomalya sa flood control. RNT
