Goitia: Matatag na paninindigan ng Pinas, sandigan ng katatagan sa rehiyon

IPINAHAYAG ni Chairman Emeritus Dr. Jose Antonio Goitia na ang tindig ng Pilipinas ay dapat nakabatay sa batas, katotohanan, at dangal ng sambayanang Filipino at hindi sa takot.

Ang pahayag ni Goitia ay matapos lumabas ang isang bagong ulat mula sa isang kilalang international think tank kung saan ipinapakita nito na ang posisyon ng Pilipinas hinggil sa isyu ng West Philippine Sea ay mas malalim kaysa sa “territorial claim”. Ito’y mahalagang ambag sa pagpapanatili ng pandaigdigang kaayusan at paggalang sa batas.

Ayon kay Goitia, binibigyang-diin ng think tank na dahil lumalawak ang galaw ng Tsina sa labas ng kaniyang rehiyon, nagiging mahalagang balanse ang Pilipinas. Kapag iginigiit umano natin ang 2016 Arbitral Ruling at tumatangging “umatras” para lang pagbigyan ang Beijing, mas lumalakas ang kaayusan sa Asya.

“Kapag ang isang bayan ay naninindigan sa tama, naririnig ito kahit sa malalayong lugar,” ani Goitia.

Ayon kay Goitia, hindi kailanman gumamit ng dahas ang Pilipinas para igiit ang tama. Kinilala aniya ng isang pandaigdigang hukuman ang ating karapatan, at hindi iyon kayang palitan ng anumang presyur o pagbabanta. Kalmado tayo, pero hindi sumusuko.

Giit ni Goitia, ayaw man natin, nakapwesto ang Pilipinas sa gitna ng mahalagang ruta ng kalakalan at seguridad. Dahil dito, malaki ang epekto ng ating mga desisyon — hindi lang sa Southeast Asia kundi pati sa mas malawak na mundo.

“Hindi natin hiniling ang papel na ito, ngunit hindi rin natin ito tatalikuran. Ang pagtatanggol sa ating karagatan ay paggalang sa mga ninunong nagbuwis ng buhay para sa ating bansa,” ayon kay Goitia.

Ayon sa ulat, tungkulin ng mga bansa na ipagtanggol ang kaayusang nakabatay sa batas. Nagiging mas payapa ang mundo kapag patas ang pagtingin sa malaki at maliit. Ngunit kapag tinatapakan ang maliliit, nagsisimula ang kaguluhan.

“Ang pagsuporta sa Pilipinas ay hindi pakikipag-away. Ito ay pagtindig para sa mundong may batas at dangal,” ani Goitia.

Ayon pa kay Goitia, kahit ituloy pa ng Tsina ang pagpilit sa kanilang mga inaangkin, di natitinag ang Pilipinas — mahinahon ngunit matibay, makatarungan at makatuwiran. Sa ganitong pagharap, naipagtatanggol natin ang rehiyon at ang kinabukasan ng bayan.

“Para ito sa mga batang Pilipinong darating pa. Maaaring lumakas ang mga alon, pero ang tapang ng Filipino ay hindi lumulubog,” ani Goitia.

Si Dr. Jose Antonio Goitia ay Chairman Emeritus ng apat na civic-oriented organizations:
Alyansa ng Bantay sa Kapayapaan at Demokrasya (ABKD),
People’s Alliance for Democracy and Reforms (PADER),
Liga Independencia Pilipinas (LIPI), at
Filipinos Do Not Yield (FDNY) Movement,
kung saan itinataguyod niya ang katotohanan, katatagan, at dangal ng sambayanang Pilipino. (RNT)