Bureau of Customs-Port of Subic acting chief of assessment Juan San Andres (c) Cesar Morales
MANILA, Philippines – Ipinahayag ng isang Senate panel nitong Miyerkules ang contempt laban kay Bureau of Customs-Port of Subic acting chief of assessment Juan San Andres matapos siyang maakusahan ng pagsisinungaling sa pagdinig ukol sa agricultural smuggling.
“On the basis of the motion as well as the explanation of Mr. San Andres, together with the clarification from (Department of Agriculture Undersecretary) Carlos Carag, we second the motion: you are cited in contempt by this committee,” ani Senate Committee chairman Sen. Kiko Pangilinan.
Naganap ang contempt citation matapos lumabas na tatlong container na nakapangalan sa Berches Consumer Goods Trading ang dinala sa isang hindi umiiral na warehouse sa Angat, Bulacan. Iginiit ni San Andres na koordinado ito sa DA Inspectorate and Enforcement unit, ngunit itinanggi ni Carag, na ang mga container ay unang nailabas sa port at naibalik lamang sa Subic.
Binanggit ni Pangilinan ang tindi ng agricultural smuggling, na pinamumunuan ng ilang dayuhan kasama ang ilang Pilipino.
“Food security is a national security concern, and therefore, agricultural smuggling is a threat to our national security. Yet despite this threat, the government’s response has been extremely weak,” sabi niya, at idinagdag na apat lamang sa 132 kaso mula 2021 hanggang 2025 ang naisampa sa DOJ, at 90 porsyento ang natigil dahil sa kakulangan ng dokumento mula sa BOC.
Nanawagan siya ng mas mahigpit na pagpapatupad ng batas laban sa smuggling. RNT
