MANILA, Philippines – Inihayag ni dating presidential spokesperson Harry Roque noong Linggo na umano’y nailabas na ng International Criminal Court (ICC) ang arrest warrant laban kay Sen. Bato dela Rosa.
Ibinahagi niya ang pahayag sa parehong araw na nagsumite siya ng liham sa Interpol upang hilinging tanggihan ang umano’y kahilingan ng pamahalaan para sa red notice laban sa kanya.
“Sen. Bato, your warrant of arrest is out! Huwag ka pa-kidnap! Insist that you have the right to be brought before a Philippine Court first!” ani Harry Roque sa kanyang Facebook post.
Gayunpaman, hindi ibinunyag ni Roque ang pinagmulan ng impormasyon o kung paano niya nalaman na may inilabas nang warrant.
Noong Nobyembre, unang sinabi ni Ombudsman Jesus Crispin Remulla na naglabas na ang ICC ng warrant laban kay Dela Rosa kaugnay ng kanyang papel sa kampanya kontra droga ng dating Pangulong Rodrigo Duterte.
Mula nang ibunyag ito ng Ombudsman, hindi na nagpapakita si Dela Rosa sa Senado.
Naghain siya ng isang “very urgent motion” sa Supreme Court upang ipilit na ilabas ng Ombudsman ang warrant, ngunit ibinasura ito ng Korte Suprema.
Samantala, sinabi ng Office of the Solicitor General na ang pangamba ni Dela Rosa sa posibleng pag-aresto ay “hindi tugma sa mga napatunayang impormasyon,” at walang opisyal na kumpirmasyon mula sa pamahalaan tungkol sa anumang ICC warrant.
Si Dela Rosa ay naging hepe ng Philippine National Police noong panahon ng “Oplan Tokhang,” kung saan siya umano ang “architect” ng madugong kampanya. Ayon sa datos ng gobyerno, higit 6,000 katao ang napatay, habang tinatayang umaabot sa 30,000 ang bilang ayon sa mga human rights groups. RNT/MND
