MANILA, Philippines – Sapul sa video si Leyte Representative, aktor, at shotgun athlete Richard Gomez na hinampas ang ulo ni Philippine Fencing Association president Rene Gacuma sa 2025 Southeast Asian Games sa Thailand.
Kinumpirma ni Gomez ang insidente, na nagsabing nagalit siya dahil tinanggal ang isang manlalaro mula sa Ormoc sa isang individual event kahit na nangunguna ito sa ranking.
“Nakatayo ako, pinapanood ko ‘yung laro tapos lumapit sila sa akin. Nung kinakausap ko na sila, tumalikod eh. Lalapit sila makikipag-usap tapos tatalikuran mo ako, bastos ka talaga. Eh talagang tinamaan,” ani Gomez.
Nagsumite naman si Gacuma ng incident report kay SEA Games Philippine chef de mission Dr. Jose Raul Canlas, na inilarawan ang pisikal at verbal na agresyon ni Gomez, kabilang ang pagbabanta at paulit-ulit na pagmumura.
“Mr. Gomez walked towards me with a quick pace. While seated at the medical station and in the presence of Thai medical volunteers, he literally capped my jawline forcefully with his right hand and siad “di mo alam ang ginagawa mo! HR ka… HR ka lang, wala ka alam sa pagiging atleta!” “Sisipain kita diyan.” He added “Alam ko saan ka nakatira!. P——, F——“ cursing over and over again.”
“Hindi daw [ako] authority to replace the athlete. He squeezed my hand really hard. He stepped heavily on my left foot like I couldn’t move,” giit pa ni Gacuma.
Ayon kay Gacuma, hindi naipalista ang manlalaro sa individual event dahil sa hindi pagsunod sa training at funding rules ng coaching staff, ngunit nakilahok siya sa team event at nakakuha ng bronze medal.
“Ang akin kasi rito, nag-qualify ‘yung bata, nag-qualify siya. Sa lahat ng qualifying events ng fencing, sumali ‘yan, nag-number one, hindi nila tinatalo, nahihirapan sila d’yan. And then bibigyan nila ng rason na hindi raw nagte-training, hindi raw nagpapakita. Sabi ko, ‘How sure are you?’ kasi taga-Ormoc ‘yan,” dagdag pa ni Gomez.
Parehong nagsabi ang dalawang kampo na hindi sila magkakapatawaran.
Ipinagtanggol ni Gomez ang kanyang ginawa, sinasabing nagalit siya sa pagkawala ng oportunidad ng manlalaro at sa nasayang na pondo ng gobyerno.
“I’ll not say sorry dahil mali ang ginawa nila. Tinanggal nila ang opportunity ng bata na maglaro sa SEA Games, tinanggal nila ang opportunity ng bata na magkaroon ng medalya, sinayang nila ang pondo ng gobyerno,” giit ni Gomez.
Kasama si Gomez sa sporting clays team na nakakuha ng silver.
“I was antagonized, I was assaulted verbally and I was insulted,” ayon naman kay Gacuma. RNT
