MANILA, Philippines – Sinabi ni Senate President Vicente “Tito” Sotto III na dapat matapos agad ang posibleng impeachment trial ni Vice President Sara Duterte kapag ito ay umabot sa Senado.
Ayon kay Sotto, irerekomenda niyang magpulong ang impeachment court mula 3 p.m. pataas, Lunes hanggang Biyernes.
“It should not be delayed, it needs to be done as soon as possible, the fastest way possible. Unfair to the public and unfair to the person being charged,” ani Sotto.
Sinabi rin niya na mahirap tukuyin kung gaano katagal ang paglilitis dahil nakadepende ito sa presentasyon ng ebidensya ng prosekusyon at depensa.
Noong Lunes, naghain ang mga petitioner ng dalawang impeachment complaint laban kay Duterte sa Kamara matapos magtapos ang isang taong pagbabawal sa paghahain ng bagong kaso. Kabilang sa mga paratang ang betrayal of public trust dahil sa umano’y maling paggamit ng P612.5 milyong confidential funds at iba pang paglabag sa Konstitusyon.
Kailangan ang suporta ng isang-katlo ng mga miyembro ng Kamara upang maipasa ang Articles of Impeachment at maipadala ito sa Senado para sa paglilitis.
Noong Agosto, in-archive ng Senado ang naunang impeachment complaint matapos itong ideklarang labag sa Konstitusyon ng Korte Suprema. Bumoto laban dito sina Sotto, Senators Bam Aquino, Risa Hontiveros, at Francis Pangilinan, habang nag-abstain si Sen. Panfilo Lacson. Labinsiyam na senador ang pabor sa pag-archive, kabilang sina dating Senate President Francis Escudero at Sen. Ronald “Bato” Dela Rosa.
Samantala, sinabi ni Sotto na sumailalim siya sa halos dalawang linggong briefing mula sa tatlong mahistrado upang mapaghandaan ang kanyang papel bilang presiding officer ng impeachment court.
“I am being briefed by some justices friends because I would want to concentrate on how to be the presiding officer of an impeachment court when it comes to rules of evidence and rules on criminal procedures,” ani Sotto.
Dagdag niya, dapat ding maging handa ang ibang senador sa kanilang tungkulin sa impeachment trial, abogado man sila o hindi. RNT/MND
