MANILA, Philippines – Tutol si Acting Budget Secretary Rolando Toledo sa panukalang alisin ang unprogrammed appropriations (UA) sa 2027 national budget, na kasalukuyan nang inihahanda ng Department of Budget and Management (DBM).
“The unprogrammed appropriation is not really a bad proposal. What is wrong is how do we use unprogrammed appropriations. It’s very important for us to limit the programs or projects that should be included,” pahayag ni Toledo sa isang forum sa UP Diliman School of Economics.
Ilang grupo at mambabatas ang nananawagan ng pag-abolish ng UA, at may ilan pang humiling sa Korte Suprema na ideklarang unconstitutional ang UA sa 2026 budget.
Ayon kay Toledo, mahalaga ang UA para sa mga foreign-assisted at Public-Private Partnership projects na minsan ay naaaprubahan lamang matapos maitakda ang taunang budget.
“Once the proposed project has been approved by the ICC (Investment Coordination Committee )… That’s the time we have to tap the unprogrammed appropriations para maituloy yung project. But there is a trigger. You have to have an excess revenue,” ani Toledo.
Ginamit din ang UA upang pondohan ang bilyong pisong flood control projects ng DPWH noong 2023 at 2024, panahong kasabay ng pagdami ng inaakusahang anomalous flood control projects ayon sa mga pagdinig sa Kongreso. Kinumpirma ni Toledo na mula sa UA ang pondo ng mga naturang proyekto.
Nangako si Toledo ng mas mahigpit na budget oversight at reporma tulad ng National Budget Circular 595-A, na mag-aatas sa mga ahensya na mag-certify na lehitimo at umiiral ang mga proyektong babayaran.
Ang unprogrammed appropriations ay mga pondong walang tiyak na source at nire-release lamang kapag may sobrang kita ang gobyerno, bagong buwis, bentahan ng state assets, o aprubadong foreign loans. RNT/MND
