LEYTE – Nakalaya na mula sa kustodiya si Albuera, Leyte Mayor Kerwin Espinosa matapos bawiin at pawalang bisa ng Cebu Regional Trial Court ang inisyu nitong warrant of arrest laban sa kanya kaugnay ng kasong pagpatay.
Sumuko si Espinosa sa National Bureau of Investigation-Central Visayas nitong unang bahagi ng buwan nang malaman ang warrant.
Ayon sa kautusan ng Presiding Judge Merlo Bagano noong Pebrero 10, 2026, ibabalik ang kaso sa Leyte dahil ang diumano’y krimen ay naganap sa Barangay Zone 10, Albuera, Leyte, at hindi sa Cebu City.
Binanggit ng korte na ang tamang paglalahad ng venue ay mahalaga sa batas kriminal at ang kakulangan nito ay maaaring maging sanhi ng pagkakansela ng kaso.
Tinanggihan rin ng korte ang aplikasyon ni Espinosa na ilipat ang kaso sa ilalim ng Republic Act No. 10660, na nagpapahintulot ng transfer ng kaso ng mga opisyal ng gobyerno sa ibang hurisdiksyon upang maiwasan ang pagkiling.
Binanggit ng korte na ang murder ay isang krimen laban sa tao at hindi kailangan ng kaugnayan sa opisyal na tungkulin, at hindi pa mayor si Espinosa nang naganap ang umano’y krimen.
Kanselado na rin ang arraignment ni Espinosa na itinakda noong Pebrero 13. Mary Anne Sapico
