MANILA, Philippines – Nalambat sa ikinasang buy-bust operation ng mga tauhan ng District Drug Enforcement Unit ng Southern Police District (DDEU-SPD) ang isang high-value individual na nakumpiskahan ng mahigit P460,000 halaga ng shabu sa Makati City noong Miyerkules ng madaling araw, Pebrero 25.
Kinilala ni SPD Director P/Brig. Gen. Randy Arceo ang nadakip na suspek na si alyas Ante, 60, residente ng Sta. Ana, Manila.
Base sa report na isinumite ng DDEU kay Arceo, naganap ang pag-aresto sa suspek bandang alas-2:00 ng madaling araw sa kahabaan ng Barasoain Street corner Binakod Street, Barangay Olympia, Makati City.
Matapos makumpirma ang nakalap na impormasyon tungkol sa ilegal na aktibidad ng suspek, agad na nagkasa ng buy-bust operation ang DDEU sa pakikipag-ugnayan sa District Intelligence Division (DID), na nagresulta sa pagkakadakip ng suspek.
Narekober sa posesyon ng suspek ang limang transparent plastic sachet na naglalaman ng 67.77 gramo ng hinihinalang shabu na nagkakahalaga ng P460,836, na nakasilid sa kulay abong Cebu Pacific Air pouch, at ang P1,000 buy-bust money kasama ang tig-P1,000 na bogus money na ginamit sa operasyon.
Ang mga narekober na ebidensya ay dinala sa SPD Forensic Unit para isailalim sa laboratory examination, habang kasalukuyang nakapiit sa custodial facility ng DDEU ang suspek na nahaharap sa kasong paglabag sa Section 5 at Section 11, Article II ng Republic Act 9165 (Comprehensive Dangerous Drugs Act of 2002) sa Makati City Prosecutor’s Office.
“The arrest of alias Ante and the seizure of nearly half a million pesos worth of shabu is a testament to our intensified efforts to track down and neutralize high-value drug personalities within our jurisdiction. We will not waver in our mission to protect our communities from the scourge of illegal drugs. I commend our team for their bravery and professional conduct during this operation to ensure that offenders are held accountable under the law,” dagdag pa ni Arceo.
