MANILA, Philippines – Magkakaroon ng 50 porsyentong diskwento sa lahat ng pasahero ng Light Rail Transit Line 2 (LRT-2) at Metro Rail Transit Line 3 (MRT-3) simula Lunes, Marso 23, ayon sa Department of Transportation (DOTr).
Ito ay alinsunod sa utos ni Pangulong Ferdinand Marcos Jr. matapos niyang suspendihin ang fare hike sa ilang public utility vehicles dahil sa pagtaas ng presyo ng langis.
Ayon kay DOTr Secretary Giovanni Lopez, “We will make their everyday commute more convenient. We will provide discounts on MRT and LRT fares. We will do everything to ensure safe travels for every Filipino.”
Mananatili rin ang 50% discount sa white beep cards para sa senior citizens, persons with disabilities, at mga estudyante. Ang blue beep cards naman para sa regular passengers ay awtomatikong magkakaroon ng 50% discount. Ang mga walang beep card ay puwede ring bumili ng single journey tickets na may parehong diskwento.
Ipinabatid ng DOTr na ang 50% discount ay ipatutupad “simula Marso 23 hanggang sa karagdagang abiso.” Nakikipag-ugnayan din ang ahensya sa LRT-1 management upang ipatupad ang parehong diskwento sa kanilang pasahero, dahil ang linya ay pinamamahalaan ng Light Rail Manila Corporation. RNT/MND
