MANILA, Philippines – Obligado si Vice President Sara Duterte at iba pang opisyal ng Office of the Vice President na isauli ang mahigit P73 milyon na confidential funds matapos ibasura ng Commission on Audit ang kanilang petition for review kaugnay ng notice of disallowance, ayon sa isang opisyal ng COA na humarap sa House justice committee nitong Martes.
Sa pagdinig kaugnay ng impeachment complaints laban kay Duterte, sinabi ni Gloria Camora ng COA’s Intelligence and Confidential Funds Audit Office na ibinasura ang petisyon na inihain ni Duterte, OVP Special Disbursing Officer Gina Acosta, at OVP Chief Accountant Julieta Villadelray dahil sa hindi pagsunod sa documentary requirements sa ilalim ng isang joint circular.
“The petition for review treated as appeal of Ms. Sara Z. Duterte, Vice President, Ms. Gina Acosta, Special Disbursing Officer, and Ms. Julieta L. Villadelray, Chief Accountant, Office of the Vice President, is hereby denied. Accordingly, Commission on Audit, Intelligence and Confidential Funds Audit Office Notice of Disallowance No. 2024-002-100 for 2022, dated August 8, 2024 on the confidential expenses of the OVP for the period from December 21 to 31, 2022 in the amount of P73,287,000 is affirmed,” ani Camora.
“What is required under the joint circular is a documentary evidence of payment,” dagdag pa niya.
Sinabi naman ni House Committee on Justice Chairperson Gerville Luistro na sakop din ng obligasyong magsauli ang P375 milyon na confidential funds ng OVP mula sa unang tatlong quarter ng 2023 na na-disallow din ng COA.
“So it’s clear that the consequence of the denial of the appeal and the issuance of the corresponding notices of disallowance is the obligation to restitute– in Filipino, ibalik ang pera. That is P73 million for the 2022 fourth quarter and P375 million for the three quarters of 2023,” ani Luistro.
Ayon kay Camora, maaari pang dumulog ang OVP sa Korte Suprema upang iapela ang obligasyong isauli ang pondo. Samantala, sinabi ni Luistro na hihintayin ng komite ang opisyal na kopya ng desisyon ng COA na nagtatanggi sa apela, gayundin ang mga notice of disallowance.
Noong Agosto ng nakaraang taon, naglabas ang COA ng notice of disallowance sa P73.287 milyon mula sa P125 milyong confidential funds ng OVP para sa 2022. Batay sa notice of disallowance, P69.7 milyon ang hindi pinayagan dahil sa hindi pagsusumite ng mga dokumentong magpapatunay sa tagumpay ng information gathering o surveillance activities na sumusuporta sa acknowledgment receipts para sa mga reward payment na cash, iba’t ibang goods, at medicines.
Ang natitirang P3.5 milyon naman ay na-disallow dahil ginamit sa pagbabayad para sa mga mesa, upuan, desktop computers, at printers, ngunit walang pagtutukoy na ang mga ito ay para sa confidential operations o activities. RNT
