MANILA, Philippines – Inanunsyo ng University of the Philippines (UP) nitong Miyerkules na 18,300 estudyante ang pumasa sa UP College Admission Test (UPCAT), katumbas ng mahigit 12 porsiyento ng mahigit 147,000 kumuha ng pagsusulit.
Sa press briefing, sinabi ni UP President Angelo Jimenez na patuloy ang pagtaas ng bilang ng qualifiers mula sa mga pampublikong paaralan.
“Students from public schools, including public science high schools, now comprise 57.1% of our qualifiers from public schools compared to 42.5% from private schools. This increase in qualifiers from public schools has been a consistent trend over the past few years. And this year it continues to move in the same direction,” aniya.
Binanggit ni Jimenez na noong 2022, mas marami ang qualifiers mula sa private schools na umabot sa 55 porsiyento, kumpara sa 44 porsiyento mula sa public schools.
“This trend suggests that steps we’ve taken to democratize access to quality UP education are beginning to make an impact in meaningful and measurable ways,” dagdag pa ni Jimenez.
Pinakamataas ang bilang ng qualifiers mula sa National Capital Region sa 29.68 porsiyento, sinundan ng Calabarzon na may 18.77 porsiyento at Central Luzon na may 11.24 porsiyento.
Ayon din kay Jimenez, tumaas ng 22 porsiyento ang bilang ng qualifiers mula sa rehiyon matapos magbukas ang UP ng testing center sa Marawi City, Lanao del Sur.
“These moments remind us why the University of the Philippines exists; not only to teach, not only to discover and to innovate but to open pathways for the next generation of Filipino leaders,” dagdag pa ni Jimenez. Santi Celario
