MANILA, Philippines – Nilinaw ng Department of Trade and Industry (DTI) nitong Sabado, Mayo 23, na ang kontrobersyal na proposal na mag-oobliga ng permit sa mga patalastas kabilang ang mga nakapost online, ay internal draft lamang at hindi ipatutupad.
Naisapubliko kasi ang draft na mag-oobliga umano ang DTI ng permit 30 working days bago ang pagpapalabas nito, kahit pa sa social media.
“The DTI assures the public and the business community that this internal draft does not reflect current policy direction and will not be finalized or enforced,” saad sa pahayag ng DTI.
Sa ilalim ng draft administrative order, ang mga advertiser ay kailangang magpasa ng detalyadong dokumento sa DTI na naglalarawan ng planong advertising materials, kabilang ang musika, script, at storyboard.
Para sa mga patalastas na naka-display sa LED boards at electronic billboards, oobligahin sa draft rules ang storyboards na naglalaman ng camera directions at descriptions ng mga visual na maaring “potentially controversial or questionable.”
Samantala, sa online advertisements naman ay kailangan ang printed layouts para sa static materials at frame-by-frame storyboards para sa video advertisements, kabilang ang mga detalye sa musika, special effects at incidental sounds.
Sa draft order, may ipinanukala rin ang DTI na advertising permits.
Ang static advertisements kabilang ang online at print materials ay may bayad na P975 kahit ano pa ang size.
Ang permit fees naman para sa moving advertisements katulad ng video at GIF ay mula P975 para sa end tags hanggang P9,295 para sa materials na lampas limang minuto.
Nagkakahalaga naman ng P300 ang amendments sa permit applications.
Ang proposed rules na ito ay layong “to strengthen the protection of consumers against false, deceptive, and misleading advertising practices,” sinabi ng DTI.
Nagbabala si Senador Bam Aquino na ang permit requirement ay magdudulot ng karagdagang pahirap sa micro, small, at medium enterprises na nahihirapan na sa epekto ng krisis sa Middle East.
“Sa panahon ngayon kung saan mabilis ang takbo ng negosyo, lalo na online, hindi dapat paghintayin ng isang buwan ang mga negosyante bago sila makapaglabas ng advertisement o promo,” sinabi ni Aquino.
“In these fast times for commerce, especially online, it is unjust to make a small business wait one month before releasing an advertisement or promotion,” dagdag pa niya.
Dahil dito ay hinimok ng senador ang DTI na bawiin ang proposal.
“Instead of adding bureaucracy, the DTI should focus on deceptive and fraudulent advertisements while helping legitimate businesses recover, grow, and create jobs for Filipinos,” dagdag pa niya.
Sa pahayag, sinabi ng DTI na nakatutok ito sa pagprotekta sa mga consumer kasabay ng pagsuporta sa mga negosyo.
“We remain a committed partner in economic growth, ensuring consumer protection is balanced with innovation and a competitive business environment,” pagtatapos ng ahensya. RNT/JGC
