MANILA, Philippines – Magpapatuloy ang oral arguments ng Supreme Court (Supreme Court of the Philippines) sa Hunyo 2 kaugnay ng mga petisyong kumukuwestiyon sa konstitusyonalidad ng unprogrammed funds at special accounts sa 2024, 2025, at 2026 national budgets.
Ang pagdinig, na nagsimula noong Abril 7, ay gaganapin sa alas-9:30 ng umaga sa Hunyo 2, at susundan pa ng mga hearing sa Hunyo 9 at 16 sa full court session hall sa Maynila.
Saklaw ng mga consolidated petitions ang umano’y mga bicameral insertions at adjustments sa General Appropriations Acts na inihain ng mga mambabatas, taxpayers, at civil society groups.
Kabilang sa mga petitioner sina dating Albay Rep. Edcel C. Lagman, Sen. Aquilino “Koko” Pimentel III, at dating Rep. Pantaleon “Bebot” Alvarez, na humihiling na ideklarang unconstitutional ang mga umano’y insertion gaya ng P449.5 bilyon sa 2024 national budget at P150.9 bilyon sa unprogrammed appropriations sa ilalim ng 2026 General Appropriations Act.
Isa pang petisyon ang tumutuligsa sa mga pagbabago sa special accounts sa 2025 budget, kabilang ang umano’y pagtaas ng Department of Public Works and Highways (DPWH) Special Road Fund.
Giit ng mga petitioner, lumalabag sa Konstitusyon ang istruktura ng unprogrammed appropriations dahil nakabatay umano ito sa inaasahang kita imbes na sa aktwal na pinagmumulan ng pondo.
Samantala, hiniling ng Office of the Solicitor General (Office of the Solicitor General Philippines) na ibasura ang mga petisyon, at iginiit na mahalaga ang unprogrammed funds bilang standby appropriation na nakadepende sa karagdagang kita ng gobyerno.
Mariin ding tinutulan ng OSG ang pag-isyu ng temporary restraining order, dahil maaari umanong magdulot ito ng pagkaantala sa mga proyekto ng pamahalaan at inefficiency sa paggasta.
Inilipat sa Maynila mula Baguio City ang oral arguments upang makatipid sa gastos sa biyahe at operasyon ng hukuman at mga panig sa kaso. RNT
