Manila, Philippines – Opisyal nang tinapos ang pre-trial proceedings, na nangangahulugang wala nang hadlang para sa impeachment trial ni Vice President Sara Z. Duterte sa Hulyo 6.
“Ang pagtatapos po ng pre-trial conference ay isang malaking hudyat na wala pong maaaring maging hadlang sa pag-umpisa ng actual impeachment trial sa nalalapit na July 6 na naaayon sa ating Saligang Batas,” sinabi ni House impeachment trial spokesperson Lanao del Sur Rep. Zia Alonto Adiong.
Sa ngayon, ayon sa mambabatas, ay naghahanda ang prosecution upang magsumite ng komento kasunod ng pagkumpleto sa pre-trial conference.
Ayon naman kay Prosecution Legal spokesperson Atty. Benjamin “Jay” Tolosa Jr., maituturing na isang malaking hakbang para sa impeachment na ito ang pagtatapos ng pre-trial conference na sinimulan noong June 18 hanggang June 25, dahil ito ay senyales na tuloy na ang paglilitis.
“We welcome this important milestone because it allows the constitutional process to move forward and gives the Filipino people the opportunity to hear the evidence, examine the facts, and know the truth through a fair, transparent, and orderly trial.”
Pinasalamatan din ng abogado ang Secretariat ng Senate Impeachment Court dahil sa pag-asiste sa magkabilang panig sa gitna ng napakaraming dokumento at ebidensya.
“We express our sincere appreciation to the Secretariat of the Impeachment Court for its guidance and accommodations that it extended to both parties, which enabled us to complete this extensive process despite the thousands of documentary exhibits involved, particularly those relating to the articles of impeachment, unexplained wealth, and confidential funds,” ani Tolosa.
May 10 araw pa bago ang opisyal na pagsisimula ng impeachment trial, kung saan maririnig, makikita, at masasaksihan ng taumbayan ang kabuuan ng proseso.
“Ang taumbayan po ay nakikinig, nagbabantay, at nagmamatyag. Deserve nila ang katotohanan at pawang katotohanan lamang. At iyan po ang panata ng prosecution team. Ang ilatag ang katotohanan at pawang katotohanan lamang sa sambayanang Pilipino sa nalalapit na paglilitis kay Vice President Sara Duterte,” dagdag pa ni Adiong.
