MANILA, Philippines – Umaasa si House lead prosecutor Gerville Luistro na matatapos na ang impeachment trial laban kay Vice President Sara Duterte bago sumapit ang Pasko.
“Ako, I am personally aiming bago mag-Pasko para masaya ang Pasko nating lahat,” pahayag ni Luistro sa isang pressconference matapos ang ika anim na araw ng impeachment trial.
Sinabi ni Luistro na isa sa layunin ng pagbabawas nila ng mga testigo na ihaharaop sa impeachment court at para na rin mapabilis ang proseso.
“Well, we are in the process of re-evaluating the list of our witnesses for the three succeeding articles,” ani Luistro. “But of course, you have to consider also that there are times when it is the exigency of the trial that demands for the withdrawal of some of the witnesses.”
Ipinaliwanag ni Luistro na nagpasya silang alisin ang ilang testigo sa Article IV matapos makita na sapat na ang mga naunang testimonya nina National Bureau of Investigation (NBI) Agent John Mark Calilung at NBI Regional Director Atty. Jeremy Lotoc.
Aniya, malalaman lamang kung kailangan pang magdagdag o magbawas ng testigo kapag narinig na ang buong pahayag ng mga nakasalang sa witness stand.
“Indeed, it is only after you’ve heard entirely the testimony of these witnesses when you will be able to evaluate, sapat na ba? Kulang ba? Kailangan bang dagdagan?” paliwanag pa ng lead prosecutor.
Nakatakdang sumalang sa witness stand sa Martes, Hulyo 21, si NBI Director Melvin Matibag bilang huling testigo ng prosekusyon para sa Article IV.
Matapos nito, isusunod na ang pagtalakay sa Article I na may kinalaman naman sa confidential funds. Gail Mendoza
