MANILA, Philippines – Tiniyak ng Department of Social Welfare and Development (DSWD) sa publiko na ang lahat ng pamilyang apektado ng tropical cyclones na “Luis” at “Maymay” at ang pinahusay na habagat ay patuloy na makakatanggap ng humanitarian assistance mula sa gobyerno.
Kaugnay nito pinakilos ng DSWD ang mga mapagkukunan nito upang suportahan ang higit sa 815,000 pamilya o higit sa 2.8 milyong indibidwal na apektado ng patuloy na sama ng panahon, pamamahagi ng mga family food packs (FFPs) at tulong pinansyal sa buong bansa.
Sa panayam ng media nitong Martes (Agosto 11), sinabi ni Asst.Secretary Irene Dumlao ng Disaster Response Management Group (DRMG) ng DSWD sa publiko ang walang patid na supply ng mga relief goods kung saan ang lahat ng mga bodega ng DSWD sa buong bansa ay nananatiling ganap na ligtas at tuyo sa gitna ng pagbaha.
“Isa sa mga requirement ng DSWD sa pagpili ng warehouses ay hindi dapat ito itinayo sa mga hazard prone areas, kaya hindi dapat binabaha, hindi malapit sa mga lugar na binabaha kaya tinitiyak natin na maayos ang kondisyon ng ating mga relief items,” sinabi ni Asst. Secretary Dumlao, na siya ring tagapagsalita ng DSWD, sa DZMM nitong Martes.
Samantala iniulat ng assistant secretary ng DRMG na tumaas kamakailan ang pansamantalang paglilipat ng mga pamilya sa mga lugar tulad ng Benguet sa Cordillera Administrative Region (CAR) dahil sa patuloy na pag-ulan, gayundin sa Sta. Maria, Bulacan kung saan ang pagtaas ng tubig-baha ang nagtulak sa mga residente na maghanap ng silungan sa mga evacuation center.
Sa kabila ng iba’t ibang nagpapatuloy na operasyon sa pagtulong sa kalamidad, ang DSWD ay nagpapanatili ng mahigit 4.7 milyong prepositioned food packs sa buong bansa at Php1.6 bilyon na standby funds upang mapanatili ang augmentation support sa lahat ng apektadong local government units (LGUs).
“Ang DSWD naman po meron pang mahigit 4.7 million pamilya food packs prepositioned across the country. Umabot na po kami ng 5 million mahigit but syempre nabawasan na dahil sa ongoing response operation, but araw-araw naman po nag pproduce ng goods yung ating Luzon Disaster Resource Center at ang Visayas Disaster Resource Center,” sabi ni Dumlao.
Batay sa ulat ng Disaster Response Operations Monitoring, Information and Communication (DROMIC) noong Agosto 11, 6:00 ng umaga, nakapagbigay ang DSWD ng mahigit Php231.9 milyong halaga ng humanitarian aid para sa mga apektadong pamilya sa iba’t ibang rehiyon na tinamaan ng pinakabagong gulo ng panahon.
Ang patuloy na pagsisikap ay naaayon sa direktiba ni Pangulong Ferdinand R. Marcos Jr. na tiyakin ang maagap at sapat na pagtugon ng pamahalaan sa lahat ng mga komunidad na naapektuhan ng kalamidad. (Santi Celario)
