MANILA, Philippines – Tinatanggap ng Philippine Coast Guard (PCG) ang dalawang 27-meter marine protector-class na patrol vessel mula sa United States of America o USA, para palawakin ang kakayahan ng bansa sa search and rescue o SAR, proteksyon sa kalikasan sa dagat, at maritime domain awareness.
Ayon kay PCG Spokesperson Commodore Noemie Cayabyab PCG, isusumpa sa serbisyo ang mga patrol vessel sa Coast Guard Fleet bilang BRP Pag-asa (PATS-2701) at BRP Patag (PATS-2702) kasunod ng inaasahang pagdating nila sa katubigan ng Maynila sa Oktubre 2026.
Bahagi ng paglilipat ang pagtatapos ng espesyal na pagsasanay sa operasyon at maintenance ng 24 na tauhan ng PCG para sa dalawang patrol vessel sa Baltimore, Maryland, USA. Ginanap ang kanilang graduation noong Agosto 20, 2026.
“Ang BRP Pag-asa (PATS-2701) at BRP Patag (PATS-2702) ay magpapalakas sa operational efficiency ng Philippine Coast Guard sa pagbabantay sa malawak na karagatan ng bansa.
Paiigtingin nito ang kakayahan nating magsagawa ng maritime safety operations at tumugon sa mga emergency sa dagat, kabilang ang oil spills at iba pang hamon sa proteksyon ng kalikasan sa dagat,” ani Commodore Cayabyab.
Dagdag pa ng tagapagsalita ng PCG na sinasalamin ng inisyatibang ito ang matagal nang ugnayan ng Pilipinas at USA at ang kanilang magkasanib na pagtitiyak sa maritime security at regional stability sa buong Indo-Pacific.
Suporta rin ang pagkuha ng mga barkong ito sa “Bagong Pilipinas” na adbokasiya ni Pangulong Ferdinand R. Marcos Jr. sa pamamagitan ng Organized National Engagement o ONE at Sea na estratehiya ng PCG at ng kampanyang Intensified Community Assistance, Awareness, Response, and Enforcement o iCARE. Jocelyn Tabangcura-Domenden
