MANILA, Philippines — Nangako si Bureau of Immigration (BI) Commissioner Joel Anthony Viado na agad aaksyunan ang mosyon para muling isaalang-alang ang 2018 blacklist order laban kay dating United Nations special rapporteur Agnes Callamard.
Ginawa ni Viado ang pahayag sa pagdinig ng House Committee on Appropriations tungkol sa panukalang 2027 budget ng Department of Justice at mga attached agency nito.
“As far as I know, there is no pending matter involving this. But once we get back to the office, we will act on it right away,” tugon ni Viado nang tanungin ni ML Party-list Rep. Leila de Lima tungkol sa umano’y nakabinbing motion for reconsideration.
Nang tanungin kung kailan ito aaksyunan, sinabi ng BI chief: “We will act on it right away, by tomorrow.”
Ayon kay Viado, batay sa rekord, inilagay si Callamard sa blacklist dahil sa national security concern na iniulat umano ng isang ahensyang panseguridad. Gayunman, sinabi niyang nangyari ito bago pa siya italaga sa BI at kailangan pa niyang suriin nang mas malalim ang kaso.
Kinuwestiyon ni De Lima kung may nagawang krimen o immigration violation si Callamard, na nagsilbing UN special rapporteur on extrajudicial, summary or arbitrary executions at nagsuri sa mga pagpatay kaugnay ng drug war.
Sinabi naman ni Akbayan Party-list Rep. Percival Cendaña na hindi kasama si Callamard sa blacklist ng Interpol.
“We’re willing to also review the status of the special rapporteur because we are in favor of human rights,” ani Viado.
Wala pang desisyon ang BI kung aalisin si Callamard sa blacklist. Ang ipinangako lamang ni Viado ay aksyunan ang mosyon para sa reconsideration. Dave Medina
