KALINGA, Philippines – Arestado ang isang 30-anyos na magsasaka na umano’y bumaril at nakapatay sa kanyang kainuman gamit ang M16 rifle sa Barangay Bagumbayan, Tabuk City noong Martes, Agosto 25.
Kinilala ng pulisya ang suspek sa alyas na “Romy,” residente ng Sitio Banagan Upper, Barangay Bagumbayan. Ang biktima naman, na kinilala sa alyas na “John,” 31, ay isa ring magsasaka at residente ng parehong lugar.
Ayon sa Tabuk City Police Station, magkasamang umiinom ang dalawa nang magkaroon sila ng pagtatalo. Habang lumalala ang kanilang argumento, umano’y nagpaputok si Romy ng M16 rifle at tinamaan si John.
Natagpuan ng mga rumespondeng pulis si John na may mga tama ng bala sa ulo at kanang braso. Nakarekober din sa lugar ang ilang 5.56mm cartridge cases.
Agad nagsagawa ng hot pursuit operation ang pulisya na humantong sa pagkakaaresto kay Romy kinabukasan, Agosto 26.
Nahaharap ang suspek sa mga kasong murder at illegal possession of firearms. Nananatili siya sa kustodiya ng pulisya habang nagpapatuloy ang imbestigasyon sa insidente. RNT/MDS
