MANILA, Philippines – Pinatibay ng Philippine Coast Guard o PCG ang interoperability nito kasama ang United States at Australia sa ginanap na ika-19 na Multilateral Maritime Cooperative Activity o MMCA sa West Philippine Sea mula Agosto 19 hanggang 25, 2026.
Kasama ang Armed Forces of the Philippines o AFP, United States Pacific Command o USPACOM, at Australian Defence Force o ADF, nagsagawa ang PCG ng joint maritime operations para mapabuti ang komunikasyon, maniobra, pagbabahagi ng impormasyon sa dagat, at sabayang pagtugon ng mga kalahok na pwersa.
Ayon kay PCG Spokesperson Commodore Noemie Cayabyab, napabuti ng aktibidad ang working relationship at operational familiarity ng PCG sa mga foreign counterparts para makapag-ugnayan sila sa pagharap sa mga hamon sa maritime security at kaligtasan.
Para sa ika-19 na MMCA, ini-deploy ng PCG ang BRP Teresa Magbanua (MRRV-9701) na sumabay sa mga barko at eroplano ng Pilipinas, US, at Australia.
Kabilang sa mga isinagawang ehersisyo: _communications exercises, maritime domain awareness, replenishment at sea, division tactics, officer of the watch maneuvers, anti-submarine warfare, photo exercise, at fly-by operations.
Mula sa Pilipinas, na-deploy din ang BRP Diego Silang (FFG-07), AW109 helicopter, FA-50 fighter aircraft, C-208B aircraft, at Sokol Search and Rescue helicopter.
Mula sa Estados Unidos:USS Santa Barbara (LCS-32) at P-8A Poseidon aircraft.
Mula sa Australia:HMAS Supply (A-195), MH-60R helicopter, at P-8A aircraft.
Sinusuportahan ng capacity-building initiative na ito ang iCARE o Intensified Community Assistance, Awareness, Response, and Enforcement campaign at ang ONE at Sea o Organized National Engagement strategic concept ng PCG, na nagtataguyod ng kooperasyon sa pagitan ng mga maritime stakeholder. Jocelyn Tabangcura-Domenden
