MANILA, Philippines – Hindi na dapat pa ikonsidera ng Pilipinas ang pagbuhay sa makasaysayang Bataan Nuclear Power Plant (BNPP) dahil sa luma na nitong imprastruktura at maaari pang magdulot ng takot sa mga mamamayan, ayon kay Senador Erwin Tulfo.
Ani Tulfo, na nangunguna sa Senate Committee on Energy, ang pasilidad na nakumpleto noong 1984 ay “very, very old,” kahit pa ipaayos.
“How safe is Bataan Nuclear Power Plant? I believe if you were to ask me, we might as well build a new facility,” sinabi pa niya sa panel discussion sa Enlit Asia 2026.
Sinabi pa ni Tulfo na ipapanukala niya sa Department of Energy na abandonahin na nang tuluyan ang BNPP.
Patungkol naman sa safety concerns, sinabi ni Tulfo na hindi kailanman pinagana ang BNPP para sa commercial use kahit noon pang panahon ni dating Pangulong Ferdinand Marcos Sr.
Sa kabila nito, sa kasalukuyang administrasyon ay humihingi ng tulong ang Pilipinas sa South Korea para timbangin ang posibilidad ng muling pagbubukas ng natenggang 620-megawatt nuclear facility.
Noong Setyembre 2025 ay pinirmahan ni Pangulong Ferdinand Marcos Jr. ang Republic Act No. 12305, o Philippine National Nuclear Energy Safety Act. RNT/JGC
