MANILA, Philippines — Kinilala ni Department of the Interior and Local Government (DILG) Secretary Jonvic Remulla noong Biyernes, Oktubre 16, ang dating miyembro ng Bangsamoro parliament at isang police non-commissioned officer bilang dalawa sa 11 persons of interest (POIs) sa 521-kilogram shipment ng hinihinalang shabu na nagkakahalaga ng P3.54 bilyon, na nasabat sa Laos bago umano maipadala sa Pilipinas.
Kabilang sa mga iniimbestigahan sina dating Bangsamoro Transition Authority (BTA) Parliament member Edriezan Hadji Nasser Rimbang, alyas “Sultan,” na nagsilbi mula 2019 hanggang 2022, at Police Executive Master Sergeant Aileen Jayne Manalo Mendoza ng Philippine National Police–Aviation Security Group (PNP-AVSEGROUP).
Nasabat ang shipment sa Luang Prabang International Airport sa Laos noong Oktubre 1.
Kabilang din sa mga POI sina Fahad Mulok Dibarosan, isang Pilipinong inaresto sa Laos; pilotong si Rioklyn Pizarras Toledo, alyas “Boyet”; Abdullah Rimbang Macarimbang, na pinaghihinalaang nagpondo sa operasyon; Aldren Nadal Samante; Rudy Isidro; Abdulkarim K. Macalatas, na umano’y tatanggap ng shipment sa Maynila; Christian Fabrigas; Rohaniah E. Rimbang; at Hilario B. De Vera, alyas “Larry.”
Ayon kay Philippine Drug Enforcement Agency (PDEA) Deputy Director General for Operations Assistant Secretary Renato Gumban, nakatanggap ang mga awtoridad ng impormasyon mula sa mga dayuhang katuwang dalawang linggo bago ang pagsabat tungkol sa dalawang posibleng shipment ng droga—isa mula Laos at isa mula Thailand.
Noong Oktubre 7, nasabat din umano ng mga awtoridad sa Thailand ang 1,178 kilo ng hinihinalang shabu na nagkakahalaga ng P8.01 bilyon sa isang fishing vessel sa Gulf of Thailand. Anim na Thai crew member ang inaresto.
Ayon kay Remulla, si Toledo umano ang kumuha ng eroplano sa Malaysia upang dalhin ang kargamento mula Laos patungong Maynila. Nakipag-ugnayan umano siya kay Mendoza, na pinaghihinalaang nag-ayos sa pagdating ng eroplano sa Pilipinas at pagkuha ng hangar sa general aviation area ng Manila International Airport.
Sinabi ni Remulla na nagbigay umano si Toledo ng pera kay Mendoza na nagmula kay Abdullah Rimbang Macarimbang, pinsan ni Sultan Rimbang. Pinaghihinalaang siya ang nagpondo sa operasyon.
Plano umanong lumapag ang eroplano sa Maynila noong huling linggo ng Setyembre at iparada sa MAPTRA hangar sa Domestic Road, Pasay City. Si Macalatas naman umano ang itinalagang tatanggap ng shipment.
Si Dibarosan ang Pilipinong pasaherong inaresto sa Laos kaugnay ng pagkakasabat. Sinusuri rin ng mga imbestigador ang ugnayang pampamilya nina Dibarosan at Rimbang, dahil magkapatid umano ang kanilang mga asawa.
Nang matanong tungkol sa larawang kasama sa link chart ni Remulla na nagpapakita sa asawa ni Rimbang kasama si dating pangulong Rodrigo Duterte, sinabi ni Remulla na hindi sapat ang kanilang ugnayang pampulitika upang patunayang sangkot ang dating pangulo.
“They are from the same political party,” ani Remulla. “This is to counter the narrative that people from Manila are the ones involved in this operation. This operation was between Sultan Edrieza Rimbang and his cohorts.”
Inalis si Mendoza sa kanyang puwesto at inilagay sa restrictive custody ng AVSEGROUP habang patuloy na iniimbestigahan ang lawak ng umano’y pagkakasangkot niya.
Ayon kay PNP Chief Police General Jose Melencio C. Nartatez Jr., nadagdagan ang mga pangalan ng iniimbestigahan habang sinusuri ang mga dokumento at transaksiyong pinansyal na may kaugnayan sa operasyon.
“One of the persons of interest was invited to appear before the CIDG this afternoon,” saad niya. “More names have been added as we learned who else arranged to receive the shipment here in the Philippines, including the documents we need to establish who paid for the transaction, who paid for the commissioning of the airplane, and the money trail.”
Sinabi ni Nartatez na pinaniniwalaang nasa Pilipinas si Rimbang. Gayunman, wala sa mga POI ang kasalukuyang wanted ng mga awtoridad.
“We checked all of them and they are not wanted persons,” ani Nartatez.
Ayon kay Remulla, maaaring magsampa sa ngayon ng kasong conspiracy kaugnay ng shipment dahil hindi natuloy ang aktuwal na paghahatid ng droga.
“The only charge we can bring for now is conspiracy because no actual transaction took place, but we have found the trail showing who was really involved,” aniya.
Hinimok din ni Remulla ang Kongreso na magpasa ng batas na magpapahintulot na italagang terrorist organizations ang mga grupong sangkot sa narco-trafficking upang mapadali ang internasyonal na kooperasyon sa pagpapatupad ng batas.
“This is based on facts, actual documents, and extensive police work. This is not guesswork, this is not an accusation, and this is not a staged performance,” saad ni Remulla. “This is what emerged from the actual investigation conducted by all the agencies involved, together with our counterparts in Southeast Asia.” RNT/MDS
