Paaralan sa Tondo, ininspeksyon ng DepEd sa epekto ng El Niño sa seguridad ng mga mag-aaral

MANILA, Philippines – Ininspeksyon ni Department of Education (DepEd) Secretary Sonny Angara nitong Miyerkules ng umaga ang kahandaan ng Lakandula High School sa Tondo, Maynila, sa epekto ng El Niño at sa seguridad ng mga mag-aaral.

Ayon kay Angara, maituturing nang “model school” ang nasabing paaralan dahil sa mga kagamitan at pasilidad na magagamit ng mga estudyante at kawani sa panahon ng emerhensiya.

Sa buong Maynila, ang Lakandula High School lamang umano ang nakasunod sa mga pamantayan sa kaligtasan at seguridad na nakita sa inspeksyon. Kabilang sa mga pasilidad nito ang CCTV cameras, metal detector, medical at rescue equipment, at Kaagapay program.

Mayroon din itong mga drop box at QR code na maaaring gamitin ng mga estudyante upang magsumbong ng pang-aabuso o pambubully.

“Maganda, maganda, I think model school siya,” ani Angara.

Bagama’t isinasagawa ang school audit at pagpapahusay ng mga safety measure sa lahat ng paaralan, sinabi ng kalihim na nagsisilbing halimbawa ang Lakandula dahil sa pagtutulungan ng Manila LGU at alumni association upang matugunan ang mga pangangailangan nito.

Ikinatuwa rin ni Angara ang agarang pagtugon ng mga pulis sa paaralan at pinasalamatan ang Philippine National Police (PNP), pamahalaang lungsod ng Maynila at iba pang katuwang sa pagpapalakas ng seguridad.

Malugod ding tinanggap ng kalihim ang pakikilahok ng mga magulang sa pag-iikot at pagbabantay sa mga bata. Ayon sa kanya, mahalaga ang kanilang papel sa pagtugon sa mga usapin tulad ng mental health at paggamit ng social media.

“Winiwelcome natin tulong ng mga parents dahil ‘yan talaga ang pakay ng Kaagapay program natin, at nakita natin dito na very well attended kaya nagpapasalamat tayo sa mga magulang—yan ay gusto nating palakasin sa buong bansa,” dagdag ni Angara.

Ayon naman kay Lakandula High School Principal Rafael Caballes, bahagi ng kanilang pagpapalakas ng seguridad ang mga safety protocol na ipinakita sa kalihim. Sinabi niyang alinsunod din ito sa inilunsad na DepEd Ordinance No. 6 tungkol sa pagtatatag ng ligtas na kapaligiran sa paaralan.

Dagdag ni Caballes, naglagay na sila ng metal detector sa pasukan at isinasailalim sa inspeksyon ang lahat ng pumapasok sa paaralan.

Sa tulong ng barangay, mga magulang at lokal na pamahalaan sa pamumuno ni Manila Mayor Isko Moreno Domagoso, naging matagumpay umano ang kanilang programa sa pamamagitan ng whole-community approach.

Samantala, donasyon ng alumni association ang 65 CCTV camera ng paaralan, habang ang metal detector ay nagmula sa mga magulang, SPTA at mga opisyal ng faculty club. Jocelyn Tabangcura-Domenden