MANILA, Philippines – Minomonitor ng Department of Migrant Workers (DMW) ang kondisyon ng mga overseas Filipino worker na nasa Japan kasunod ng magnitude 5.7 na lindol na tumama noong Linggo, Nobyembre 8, 2026.
Ayon sa Japan Meteorological Agency, ang lindol ay naitala sa Shizuoka Prefecture at may lalim na 40 kilometro.
Naapektuhan ng lindol ang Hamamatsu at mga bahagi ng Aichi, Kyoto, Nara, Yamanashi, at Gifu.
Sinundan ito ng mas maliliit na aftershock.
Nagpapatuloy ang monitoring efforts ng DMW sa pakikipagtulungan sa Migrant Workers Office (MWO) at Overseas Workers Welfare Administration (OWWA) nito sa Tokyo.
“The MWO and OWWA in Tokyo are coordinating with the Philippine Embassy and relevant Japanese authorities to check on the condition of Filipinos in the affected areas and determine whether assistance is needed,” saad sa abiso ng ahensya.
“The DMW advises OFWs and other Filipino nationals in central Japan and nearby areas to remain alert for possible aftershocks, follow official safety advisories, and prepare essential supplies,” dagdag pa.
Hinimok ng ahensya ang mga OFW na tukuyin ang mga designated evacuation site at umiwas sa mga lugar na may banta ng landslide at rockfall. RNT/JGC
