MANILA, Philippines- Lumahok ang Philippine Coast Guard (PCG) sa Inter-Agency exercise Alalayan 2023 nitong Agosto 11.
Ayon kay National Coast Watch Center (NCWC) Director at Maritime Security Law Enforcement Commander ng PCG, CG Vice Admiral Roy Echeverria, nilalayon nitong subukan ang mga protocol at ipakita ang kakayahan ng NCWC at mga ahensya na suportahan upang makita, kilalanin, at hadlangan ang mga banta sa dagat sa loob ng karagatan ng Pilipinas.
Sinubukan din ng mga lumahok na ahensya ang Indian Ocean Regional Information Sharing & Incident Management Network (IORIS) bilang isang secure na platform ng komunikasyon para sa pagpaplano at koordinasyon ng interagency kapag tumutugon sa mga insidente.
Kasama sa maritime exercise scenario ang illegal drug trafficking, goods smuggling, human trafficking, at pagtugon sa sunog sa karagatan.
Bukod sa 97-meter multi-role response vessel, ang BRP Melchora Aquino (MRRV-9702), ang PCG ay nag-deploy din ng BRP Malapascua (MRRV-4403), BRP Boracay (FPB-2401), at isang Coast Guard Aviation Force (CGAF) helicopter na lumahok sa nasabing inter-agency capacity-building initiative.
Nagpadala rin ang Philippine Navy, ang Philippine National Police-Maritime Group, at ang Bureau of Quarantine ng kani-kanilang mga asset at tauhan.
Ang Office of the President’s NCWC at ang European Union’s Critical Maritime Routes Indo-Pacific (CRIMARIO II) na kinakatawan ni Political Counselor Frederic Grillet ng European Union Delegation in the Philippines, ang nag-organisa ng kaganapan.
Kabilang pa sa mga lumahok na mga ahensya ay ang Armed Forces of the Philippines (AFP) Command Center, ang AFP Intelligence Service, Bureau of Immigration, Bureau of Fisheries and Aquatic Resources, Bureau of Customs, at ang Philippine Drug Enforcement Agency. Jocelyn Tabangcura-Domenden
