Babaeng Chinese na wanted sa pyramid scam, inaresto ng BI sa Laguna

MANILA, Philippines – INIULAT ng Bureau of Immigration (BI) na naaresto ng kanilang mga tauhan ang isang babaeng Chinese na wanted ng awtoridad sa kanilang bansa dahil sa pagkakasangkot sa large-scale pyramid investment scam.

Kinilala ni Immigration Commissioner Norman Tansingco ang wanted na si Liu Jing, 44, na inaresto sa loob ng kanyang bahay sa isang subdivision sa Biñan, Laguna ng mga operatiba ng fugitive search unit (FSU) ng BI.

Si Liu ay inaresto ng operatiba ng BI-FSU sa bisa ng mission order mula kay Tansingco sa kahilingan ng Chinese authorities.

Ayon kay Tansingco, kinansela ng gobyerno ng China ang pasaporte ni Liu na maituturing nang isang undocumented alien at maaari na itong ipa-deport.

Over-staying na rin si Liu kung saan dumating sa bansa noong Disyembre 31, 2019 bilang turista at hindi na umalis pa simula noon.

“She will thus be deported for being an undesirable, overstaying and undocumented alien,” ayon kay Tansingco.

Ayon kay BI-FSU acting chief Rendel Ryan Sy, si Liu ay may nakabinbin na arrest warrant ng public security bureau sa Yongjian district ng Handan City sa Hubei province, China noong Mayo 12, 2021.

Ayon sa BI, si Liu ay inakusahan na bumuo at nag-operate ng pyramid investment schemes sa pamamagitan ng foreign currency exchange platform na nakapanloko ng mahigit 300,000 na mga Chinese na umabot sa mahigit US$2.5 million.

Si Liu ay kasalukuyang nakadetine sa BI warden facility sa Camp Bagong Diwa, Taguig City habang hinihintay ang kanyang deportation proceedings. JAY Reyes