Bahay-ampunan sa QC pinasara ng DSWD

MANILA, Philippines – Pinasasara na ng Department of Social Welfare and Development (DSWD) ang isang ampunan sa Quezon City dahil inilalagay umano ng pasilidad sa panganib ang mga batang naroon.

Sa press briefing nitong Martes, sinabi ni DSWD Secretary Rex Gatchalian na personal niyang binisita ang Gentle Hands Inc. (GHI) noong Sabado, kasama ang mga rehistradong social worker, at nalaman na ang pasilidad ay masikip, madumi, walang bentilasyon, at walang maayos na fire exit.

Aniya, 80 bata lamang ang kayang tanggapin ng privately-owned orphanage ngunit 149 na bata ang tumitira sa kanila sa kasalukuyan.

Dagdag pa ni Gatchalian, ang mga fire exit ng mga pasilidad ay tinatakpan ng mga metal grills.

Sinabi naman ni DSWD Undersecretary Pinky Romualdez na sumang-ayon ang orphanage na ibigay ang 149 na bata sa DSWD.

Ang mga nailigtas na bata ay ililipat sa kanilang residential care facility, sabi ni Gatchalian.

Ang GHI ay isang duly registered at licensed social welfare and development agency ng DSWD na may lisensya hanggang Agosto sa susunod na taon. RNT